La grava parto estas la malplena "span"-elemento kaj ties atributoj. La valoro "id"-atributo devas komenciĝi per la nomo de la responda tekstokampo. En la ekzemplo temas pri "comment" (la responda "textarea"-elemento havas 'id="comment"'). Sed aldone estu "_cxapeladosxaltilo". Necesas ankaŭ "class"-atributo. Ĝi havu la valoron "cxapeladosxaltilo" aŭ alternative "cxapeladosxaltilo sxaltita" (estu spaceto inter la du vortoj). Se oni aldonas "sxaltita", la aŭtomata ĉapelado estas dekomence aktivigita, kaj la uzanto devas mem malŝalti ĝin, se li ne deziras aŭtomatan ĉapeladon. Se oni ne aldonas "sxaltita", tiam la aŭtomata ĉapelado estas dekomence malŝaltita, kaj la uzanto devas mem ŝalti ĝin, se li volas aŭtomatan ĉapeladon. La "p"-markoj en la ekzemplo ne estas nepraj, sed ofte ili estas konvenaj. Tio tute dependas de la cetera aranĝo de la HTML-kodo. Rimarku, ke la "span"-elemento estas malplena (ĝi tute ne enhavas tekston aŭ io alian inter la komenca kaj fina markoj). La Javaskripta kodo de Cxapelado aŭtomate aldonas la efektivan ŝaltilon ene de la "span"-elemento. En iuj etosoj povas esti necese iom ŝanĝi la stilfoliajn regulojn (CSS) por ke la ŝaltilo bone montriĝu kaj aspektu. Pri tio tamen ne eblas doni detalajn konsilojn, ĉar la multaj etosoj de WordPress havas tre diversajn stilregulojn. Se la uzanto malŝaltis Javaskripton en sia TTT-legilo, la aŭtomata ĉapelado ne funkcias. Tiam eventuala ŝaltilo ne aperas.